La senda scenica vain cumpletteda fin l’an 2025 cun ulteriuors puncts scenics e maina da la Plazza Bernina stip sü per la Via da Mulin. Zieva vo que a dretta suravi la Punt da Surovas. Sün sendas existentas aint il God Tais romantic riva Ella/El darcho inavous tar la Punt ota nouva. Düraunt la spassageda invidan differents puncts scenics da‘s fermer e da scuvrir. Tschertüns evran vistas spectaculeras illa chavorgia, oters drizzan il focus pütöst sülla natüra unica intuorn la chavorgia. Tuot ils puncts scenics quintan chosas interessantas davart Puntraschigna e sia chavorgia chi paun gnir lettas via codes da QR. Ch’Ella/El sfuondra in ün muond fascinant. 

Actuelmaing sun accessibels duos dals nouvs puncts scenics: la trev d’equiliber spectaculera cò tar la Plazza Bernina scu eir la plattafuorma panoramica «Scena da glatsch» i’l center dal lö da rampcher sün glatsch. Quella as rechatta in ün vout da viaduct suot la Via da Mulin. Lo vain Ella/El a savair dapü davart il rampcher sün glatsch illa chavorgia e davart Puntraschigna scu vschinauncha dals alpinists. Ils differents puncts scenics da la chavorgia Ova da Bernina vegnan realisos in etappas. La sted 2023 es gnieu fabricho l’elemaint centrel: la Plazza Bernina culla trev d’equiliber da 37 meters lungezza. La construcziun d’atschel es accessibla sainza barrieras e «penda» sur la chavorgia. Chi chi chamina sül fuonz semitransparent po resentir da fich daspera las stipüras e l’asprezza da la chavorgia stretta.

La sted 2024 vegnan realisos quatter ulteriuors puncts scenics, na pü uschè spectaculers scu la trev d’equiliber, dimpersè construcziuns simplas e marcaziuns architectonicas chi drizzan l’öglieda vers particulariteds pittorescas. D’üna vart vain fabricho tar la Via da Mulin ün oget sumgiaint ad ün telescop. Quist telescop es accessibel e taundscha aint per la chavorgia. Üna lastra da vaider dal fuonz fin sül palintschieu sur separa ils giasts dal precipizi. Impü vegnan tiers trais puncts scenics da l’otra vart da la chavorgia. Aint il God Tais, quist god magic da dschembers e larschs, vegnan inscenos in möd discret puncts panoramics natürels ed elemaints marcants da la cuntredgia, scu per exaimpel ün crap erratic. Cun que as serra la senda circulera intuorn la chavorgia. 

La sted 2025 vain per intaunt termineda l’inscenaziun da la chavorgia da l’Ova da Bernina – cun duos ulteriuors puncts scenics i’ls contuorns da la Plazza da Bernina. D’üna vart vain realiso ün «Palc panoramic» suotaint la Punt ota nouva. Per fer que vain rendieu accessibel il prüm vout da viaduct da la punt. Da l’otra vart vain augmanteda l’attractivited dal punct panoramic natürel i’l parc da l’Hotel Saratz, inua cha s’ho da vegl innò pudieu giodair üna da las vistas las pü müravgliusas illa chavorgia e sülla Punt ota veglia istorica.

Ulteriuors plauns d’inscenaziuns, per exaimpel tar la Punt da Surovas, gnaregian realisos pü tard tenor pussibilted ed in occasiun da sanaziuns da punts e vias. 

La senda scenica circulera intuorn la chavorgia da l’Ova da Bernina es dal rest punct da partenza centrel per numerusas ulteriuras attracziuns i’l spazi da recreaziun Bernina Glaciers. Quel s’extenda da Puntraschigna fin giò la Valposchiavo italofonica. Situo lung la lingia dal Patrimuni mundiel UNESCO da la Viafier retica, fascinescha il spazi otalpin taunt a scuvriduras scu eir a giodeders. E que cul territori da vadrets il pü grand dal Grischun e la cuntredgia furmeda dals gigants da glatsch, scu eir cun cunfins linguistics e meteorologics dal Grischun dal Süd e cun cultura, architectura e culinarica gustusa.