Scha’s sto cò da sted e’s guarda illa profundited, nu’s po s’imaginer cha giò lo vegna eir rampcho. E cu! La chavorgia da l’Ova da Bernina es ün magnet per fans dal rampcher sün glatsch chi vegnan da tuot las varts. Daspö il 2007 metta Puntraschigna ad ir minch’inviern ün center da rampcher sün glatsch – ün ulteriur pass important illa lungia tradiziun alpinistica da la vschinauncha. Puntraschigna es la vschinauncha d’alpinists in Grischun. D’ingrazcher es que al grandius massiv dal Bernina, inua cha las Alps s’adozan aunch’üna vouta fin a 4048 meters sur mer aunz cu as sbasser viepü vers ost. Dapü davart Puntraschigna scu vschinauncha dals alpinists vain Ella/El a savair cul code QR. Ulteriuras infurmaziuns in connex cul rampcher sün glatsch chatta Ella/El sü per via tal punct scenic «Suot la Via».
Viaduct da Mulin
 |
Sgür sül piz daspö il 1872
La mited dals ans 1850 cumainza il turissem da muntagna illas Alps. Tuot in üna vouta as voul rampcher süllas muntagnas fin uossa imnatschantas e prievlusas. Eir süls gigants da naiv e glatsch dal massiv dal Bernina. Per cuntanter ils giavüschs dals giasts, nascha il mister da la guida da muntagna. A Puntraschigna s’uneschan dal 1872 duos dunzainas homens cun experienza illas muntagnas e fuondan üna societed. Que es pür la terza societed da guidas da muntagna in Svizra.
Prüma traverseda dal Piz Palü
Guidas da muntagna cuntschaintas sun Christian Klucker, Martin Schocher u Hans e Christian Grass. Ils duos frers da Puntraschigna guidan dal 1868 trais alpinists suravi tuot ils trais pizs dal Palü. Cun que als gratagia la prüma traverseda dal Palü, da quel temp üna prestaziun alpinistica remarchabla, hozindi üna da las turas las pü populeras i’l massiv dal Bernina. Sch’Ella/El vuless savair dapü davart l'istorgia locala da l’alpinissem, schi arcumandainsa üna visita i’l Museum Alpin.
Piz Palü – ün böt realisabel
Il Piz Palü vela scu la pü bella muntagna da naiv e glatsch dal muond. Cun ün pô trenamaint ed üna fitness sufficiainta è’l pels bgers ün böt realisabel. Per congualer: Chi chi’d es bun dad ir da Puntraschigna sül Piz Languard, ragiundscha eir il Piz Palü. Che cha’s drouva eir auncha, La/Al declera gugent la scoula d’alpinissem da Puntraschigna, fundeda dal 1962. Ella es la pü veglia e la pü granda scoula d’alpinissem in Grischun.
|
Aint illa Sela da festa da las Alps
Ün term important per Puntraschigna es dal 1956 la construcziun da la pendiculera da Diavolezza. La chamanna Diavolezza – insembel cun differentas chamannas dal CAS punct da partenza per turas otalpinas i’l massiv dal Bernina – exista già pü lönch. Culla pendiculera nouva as scurznescha la lungia munteda sül Piz Palü. A listess temp nascha ün bel territori da skis ed üna destinaziun d’excursiun impreschiunanta. Per ünguotta nu’s nomna la vista da la terrassa da Diavolezza «Sela da festa da las Alps».
Scha maunchan quatter meters
Cugnuoscha Ella/El la pü ota muntagna dal Grischun? Üna dumanda simpla: natürelmaing il Piz Bernina cun 4048 m s.m. Da tuot las muntagnas sur quattermilli meters da las Alps es el situo il pü a l’ost. Ma cugnuoscha Ella/El eir la seguond-ota muntagna dal massiv dal Bernina? Na, il Piz Palü nun e que – quel ho «be» 3899 meters –, dimpersè il Piz Zupò cun 3996 meters. «Zupò» es üna fuorma pü veglia da «zuppo». Il nom deriva dal fat cha’l Piz Zupò nun es visibel da la vart dal nord.
