La Chavorgia da l'ova da Bernina

In princip po Ella/El cumanzer la senda circulera tar mincha punct scenic ed ir in tuottas duos direcziuns. Nos cussagl es da cumanzer tar la Trev d’equiliber spectaculera sülla Plazza Bernina e d’explorer alura ils ulteriuors puncts scenics lung la Via da Mulin. Cò po Ella/El guarder illas profunditeds e resentir la forza sulvedgia da l’ova. Zieva vo que a dretta suravi la Punt Surovas. Aint il God da Tais romantic spettan puncts scenics chi mettan il focus sül god misterius da dschembers e larschs e la cuntredgia unica. 

Ils differents puncts scenics consistan dad edifizis modests e fuormas geometricas simplas chi s’integreschan bain illa cuntredgia arcaica. Els nun invidan be da’s schmüravglier, dimpersè eir da gnir a savair chosas infurmativas ed interessantas davart Puntraschigna: per exaimpel davart l’istorgia da la renumneda vschinauncha d’alpinists, davart il rampcher sün glatsch aint illa chavorgia, ils secrets dal god da dschembers e larschs e bger oter pü. Las infurmaziuns as survain sül lö via code QR. 

L’elemaint centrel da la senda scenica circulera es la Plazza Bernina culla trev d’equiliber da 37 meters lungezza. La construcziun d’atschel es accessibla sainza barrieras e «penda» sur la chavorgia. Chi chi chamina sül fuonz semitransparent po resentir da fich daspera las stipüras e l’asprezza da la chavorgia stretta. 

La senda scenica circulera intuorn la chavorgia da l’Ova da Bernina es dal rest punct da partenza centrel per numerusas ulteriuras attracziuns i’l spazi da recreaziun Bernina Glaciers. Quel s’extenda da Puntraschigna fin giò la Valposchiavo italofonica. Situo lung la lingia dal Patrimuni mundiel UNESCO da la Viafier retica, fascinescha il spazi otalpin taunt a scuvriduras scu eir a giodeders. E que cul territori da vadrets il pü grand dal Grischun e la cuntredgia furmeda dals gigants da glatsch, scu eir cun cunfins linguistics e meteorologics dal Grischun dal Süd e cun cultura, architectura e culinarica gustusa.